Albisteak

Euskaraz ikasteko aukera hedatuko dugu Nafarroa osoan.

2015-02-19

Gaur bertan, onartuta geratu da Nafar Parlamentuan euskaraz ikasteko aukera zabalduko duen  "Vascuencearen legea"n aldaketa. Bide luzea egitekoa badugu ere, poztekoa den berria dugu hau.

Euskalgintzako hainbat eragileetako ordezkariak bildu gara bai Parlementu atean zein barruan, eztabaida bertatik bertara segitzeko. Argudioak gora eta behera, aldeko 27 bozkarekin aurrera atera da legean modifikazioa. Duela 28 urte onartu zuen Nafarroako Parlamentuak euskararen legea. Eta honek diskriminazioa suosatu du Euskararentzat eta era bereziago batean euskaraz bizi eta ukatu zaigun Nafar herritar askorentzat. Horma bota dugu. 

Pasa den urtarrilaren 14an, egun bakar batean, Nafarroako Parlamentuan, euskarak pairatzen duen “errealitatea” gure begien aurrean agertu zen, bere krudelkeria osoan. Eta orain kontatuko duguna Euskararen Herriko hiriburuan gertatu zen, sinesgaitza benetan !

Eguerdiko 12etan, lan saio batean, gure ordezkari politikoak, Iruñea hiriko sarreretan dauden seinaletan, “Pamplona” ondoan, “Iruñea” jartzearen inguruan eztabaida sutsuan aritu ziren. Hiriko euskalgintzak egindako aldarrikapen-proposamena izan zen, euskarak behar duen agerikotasunean aurrerapausoak ematea helburua zuena. Iruñean oraindik, nahiz eta eskubidea izan, euskaraz bizitzea hautatu dugunoi, administrazioak, bigarren mailako biztanleak sentiarazten gaituzte.

Beste aldetik, arratsaldeko 4:30ean, Parlamentu berean, beste lan saio bat. Berriro gure ordezkari politikoak eztabaida sutsuan. Kasu honetan, 1986an onartutako “Vascuencearen Legea”, batzuen iritziz, aldatzeko, edota, beste batzuen arabera, bere horretan sakontzeko, proposamena mahaigainean. Azkenean, bozketa, alde. Buf! Eskerrak ! Ez geunden alde aterako zenik guztiz ziur, hala ere, aurrerapauso historikoa omen da ...

Ikusten al duzue kontrastea? Eskubidez ari gara, euskaraz bizitzeko eta ikasteko eskubidez. Gaur bozkatu dena, ziurrenik, aurrerapauso historikoa da. Baina, ziurrenik ere, egun horretan oraindik, Iruñea hiriko sarreretan, “Pamplona” soil bat irakurtzen jarraituko dugu, eta Iruñean bezala, beste hainbeste Nafarroako errepide, herri eta hirietan.


Sortzen Elkartearen ustez, aurrerapauso historikoak jendarteak ematen ditu. Kasu honetan, beste askotan bezala, politikariak jendartearen atzetik doaz, beti berandu. Honi, Nafarroako Administrazioan daukagun “panorama” gehitu behar diogu. Badirudi, “Euskara” hitzak, zenbait “politikari” nafartarrei, alergia ematen diela, eta hitz horren truke, “vascuencea” erabiltzen dute gaztelera hutsean ematen dituzten prentsa agerraldietan. Eta euskara eta hezkuntza elkartzen badugu, zer esan!!! Nafarroako Gobernuko lehendakariak horrela onartua, D ereduaren gorakadari oztopoak jartzeko helburuarekin, ingelera eskoletan ikasteko plan bat asmatu, eta nahiz eta baldintzak ez egon, presaka hedatu behar izan dute; gure haurrak, nafartar euskaldun eleaniztunak izatea ekidin nahi dute, kosta ahala kosta!.

Zentzu horretan, eta azken aste hauetan argitaratu diren Hizkuntz-Maparen datuek horrela konfirmatu digute: hizkuntza batek, eskolaz gain, espazioak, iniziatibak eta planak. Euskarak, komunikaziorako hizkuntza bat den heinean, ikastetxeez gain, eremu publikoa eta etxekoa garatu behar ditu. Egoera honetan, D ereduak, datozen urteotan Nafarroan izango dituen erronkei behar den bezala aurre egiteko, Euskalgintzako zein Hezkuntzako eragileen elkarlana eta konpromisoa beharko ditu. Eta honekin batera, arduraz jokatuko duen Administrazioa ere, guztiz beharrezkoa izango dugu.

Gaur azkenean, Nafarroako Parlamentuan nafartar gehiengoaren hitza eta nahia entzun da, eta D eredua lurralde osoko haurren eskura egongo da. Hortik aurrera, Nafarroako jendartearen gehiengoaren hitza errespetatu beharko du Nafarroako Gobernuak, eta D eredua, eta euskara, ahalik eta txoko gehienetara zabaltzeko ahalegina egin beharko du. Bai, ez da erraza izango, eta aurrekontu eta plan bereziak egin beharko dira, bestelako “english”-ereduak zabaltzeko egiten diren bezalaxe, baina kasu honetan, aldez aurretik, emaitzak bikainak izanen direla, jakinda. Arduraz jokatzea eskatzen diogu Nafarroako Hezkuntza Departamenduari, ez da aitzakietan ibiltzeko garaia, alde batetik gehiengoaren nahia delako, eta bestetik, Nafarroako haurren etorkizuna jokoan dagoelako, eta joko horretan tranpetan ibiltzea onartezina da.

Bukatzeko, Sortzen Elkartea osatzen dugunon poztasuna lau haizetara zabaltzea besterik ez zaigu falta, eta bide batez, “Vascuencearen Legearen Hormaren” kontra kolpeka jarraitzeko gogoa eta indarra biziberri zaigula jakin ezazue. Datorren urtean D ereduaren zabalpena hasiko da Nafarroa osoko ikastetxetan, eta horrekin batera, ziur gaude, Euskara errespetatuko duen Legea etorriko da, eta eremuak desagertuko dira, eta ... ongietorriak !

Eman zure iritzia

Zure e-posta helbidea ez da argitaratuko. Eremuak guztiak beharrezkoak dira.

Egin zure iruzkina

Captcha image

Jaso diren iruzkinak